A páxina web da Coordinadora Galega de Equipos de Normalización e Dinamización Lingüística ofrécenos un completo catálogo de recursos para
coñecermos a biografía e a obra do poeta e tradutor Xosé María Díaz Castro, a
quen se homenaxea este ano no Día das Letras Galegas.
De todos eles escollemos o Telexornal Díaz Castro, un informativo
que repasa a vida e a obra do autor e que foi elaborado pola alumnado do
CPI Os Dices de Rois, coa dirección e realización
do seu profesor Luís Aldegunde.
E despois unha curtametraxe de animación sobre “Penélope” (realizada polo Obradoiro de Plástica do IES As Barxas de Moaña, por Paula Solla de 1º Bacharelato), o poema máis coñecido de Díaz
Castro, que pertence ao seu libro Nimbos (que se pode ler na páxina
poetadiazcastro) e que tamén figura en moitas antoloxías de poesía, cuxo texto
é:
Un paso adiante e outro atrás, Galiza,
e a tea dos teus soños non se move.
A espranza nos teus ollos se espreguiza.
Aran os bois e chove.
Un bruar de navíos moi lonxanos
che estrolla o sono mol coma unha uva.
Pro ti envólveste en sabas de mil anos,
e en sonos volves a escoitar a chuva.
Traguerán os camiños algún día
a xente que levaron. Deus é o mesmo.
Suco vai, suco vén, ¡ Xesús María!,
e toda cousa ha de pagar seu desmo.
Desorballando os prados como sono,
o Tempo vai de Parga a Pastoriza.
Vaise enterrando, suco a suco, o Outono.
¡ Un paso adiante e outro atrás, Galiza!
Ningún comentario:
Publicar un comentario